Yerli internet provayderi Gəncədə genişzolaqlı fiber-optik internet xidmətləri göstərməyə başlayıb

“Ailə TV” şəbəkəsinin qolu olan “Ailə NET” internet provayderi Gəncə şəhərində genişzolaqlı fiber-optik internet xidmətləri göstərməyə başlayıb. 2012-ci ilin yanvar ayından etibarən şəhərdə “Ailə NET”-in fiber-optik internet şəbəkəsi quraşdırılması işlərinə başlanılıb. Görülən işlər nəticəsində artıq şəhərdə yerləşən 100-ə yaxın binada “Ailə NET”-in fiber-optik şəbəkəsi quraşdırılıb və sakinlərin istifadəsi üçün hazır vəziyyətə gətirilib.

Hazırda şəhərin “Yeni Gəncə” massivində, Heydər Əliyev və Atatürk prospektlərində, o cümlədən, Nizami və Cavadxan küçələrində “Ailə NET”-in genişzolaqlı internet xidmətinə qoşulmaq mümkündür. Bu barədə “İCTnews” elektron xəbər xidmətinə “Ailə TV”-nin mətbuat katibi Teymur Hacıyev məlumat verib. Onun sözlərinə görə,

“Ailə NET” Gəncə şəhərində fəaliyyət göstərən internet provayderlər arasında sərfəli qiymətləri ilə də diqqəti cəlb edir. Belə ki, hazırda Gəncə şəhərinin sakinləri 1 Mbit sürət üçün 20-30 manat arası aylıq vəsait ödəyirlər: ”Buna görə də “Ailə NET”-in xidmətlərinə böyük tələbat var idi. “Ailə NET”-in tarifləri isə digər provayderlərlə müqayisədə olduqca sərfəlidir.

Belə ki, 4 Mbit sürətində olan internet paketinə qoşulmaq üçün abonent cəmi 20 manat pul ödəməlidir. Bundan başqa, əgər abonent həm qiyməti 9 manat olan kabel televiziyasının standart paketini və qiyməti 20 manat olan 4 meqabitlik internet paketini birlikdə əldə etsə, o zaman güzəştlər də əldə edəcək. Hər iki xidmətə görə cəmi 22 manat ödəyəcək.

“Ailə NET”-in təklif etdiyi internet xidmətinin sürəti 4-100 meqabit arası dəyişir”. Qeyd edək ki, genişzolaqlı optik internet xidməti İKT sahəsində ən qabaqcıl texnologiyalardan hesab olunur.

Fiber-optik şəbəkə vasitəsi ilə ötürülən informasiyanın həcmi digər şəbəkələrə nisbətən qat-qat yüksəkdir. Belə ki, digər şəbəkələrdə ötürülən informasiyanın həcmi meqabaytla hesablandığı halda, fiber-optik kanal üzərindən ötürülən informasiyanın həcmi daha böyük ölçü vahidi olan terobaytla (T/bits) ölçülür. Bu da yüksəksürətli internet deməkdir. Fiber-optik şəbəkə vasitəsi ilə təmin olunan internetdə sürət itkisi də olmur.

Yükləmə sürətləri (upload, download) provayder tərəfindən verilən internetin sürətinə bərabər olur.“Ailə NET” Azərbaycanda və Cənubi Qafqazda genişzolaqlı fiber-optik internet xidməti göstərən ilk şirkətdir.

HƏQİQƏT