“Baidu” şirkətinin xalis mənfəəti artıb

Milli bazarda ən böyük axtarış sisteminə malik Çinin “Baidu” şirkətinin  rüblük mənfəəti bazar gözləntilərindən çox olub. Bu, son illərdə mobil sektorda reklam xərclərinin artması fonunda baş verib.

“ICTnews.az” elektron xəbər xidməti “dailycomm.ru” saytına istinadən bildirir ki, 2013-cü ilin ikinci rübünün yekununa əsasən, “Baidu” şirkətinin xalis mənfəəti 2,64 milyard yuan (təxminən 431 milyon dollar) olub. “Bloomberg” agentliyi tərəfindən soruşulmuş analitiklər bu göstəricinin 2.4 milyard yuan təşkil edəcəyini bildirmişdilər. Mədaxil 39% artaraq 7,56 milyard yuan olub.

Mədaxilin 10%-i “Baidu”nun smartfon və planşetlər üçün axtarış tətbiqində yerləşdirilmiş reklamdan əldə edilib.

Ötən rüb Çin şirkəti təxminən 2100 insan işə qəbul edib. Beləliklə, şirkətin heyəti 24 min əməkdaşdan ibarətdir.

Emil Hüseynov
 

---