BSA hesabatına görə, Azərbaycanda pirat proqram təminatının istifadəsi azalıb

Azərbaycanda son iki il ərzində pirat proqram təminatının istifadəsi  azalıb.
“ICTnews” xəbər xidmətinin BSA hesabatına əsasən verdiyi məlumata görə, 2007-2013-cü illəri əhatə edən hesabatda bildirilib ki, Azərbaycanda 2013-cü ilin nəticələrinə əsasən,  pirat proqram təminatının istifadəsi  2011-ci ilə nisbətən  2% azalaraq 85% təşkil edib. 2007-ci ildə bu göstərici 92%, 2009-cu ildə 88% təşkil edib.

Bununla yanaşı, ölkədə 2013-cü ilin nəticələrinə əsasən, kompüterlərə tətbiq edilmiş lisenziyasız proqram təminatının kommersiya dəyəri 35%-dək artaraq 103 milyon dollar təşkil edib. 2007-ci ildə bu göstərici 50 milyon dollar, 2009-cu ildə 52 milyon dollar, 2011-ci ildə isə 67 milyon dollar təşkil edib.
Sevindirici haldır ki, Azərbaycanda  lisenziyasız proqram təminatından istifadə edənlər Belarus (86%), Ermənistan (86%), Gürcüstan (90%) və  Moldovadan (90%) azdır.

Ümumilikdə hesabat dövründə dünya üzrə lisenziyasız proqram təminatının bazar payı orta hesabla 43%, pirat proqram təminatının istifadəsindən dəyən ziyanın dəyəri isə 62 milyard 709 milyon dollar təşkil edib.
Hesabatda bildirilir ki, lisenziyasız proqram təminatının istifadəsinin əsas təhlükəsi kimi istifadəçilərin 64%-i hakerlərin sanksiyalaşdırılmamış müdaxiləsini, 59%-i isə məlumat itkisini əsas götürür.
 
Aynur Vəliyeva

---