“EBay”ın sabiq rəhbəri “Hewlett-Packard”ın yeni baş direktoru olub

“Hewlett-Packard” şirkətinin Direktorlar Şurası, sentyabr ayının 22-də əvvəllər “eBay” internet-hərracına rəhbərlik etmiş Meq Uitmeni şirkətin yeni əsas icraçı direktoru təyin edib. Bu barədə “HP” şirkətinin press-relizində bildirilib.

Meq Uitmen şirkətin əsas icraçı direktoru və prezidenti vəzifələrini icra edəcək. “HP” şirkətinin əvvəlki rəhbəri Leo Apoteker vəzifədən kənarlaşdırılıb.

Meq Uitmen 1998-ci ildən 2008-ci ilə qədər, 10 il ərzində “eBay” internet-hərracının prezident və əsas icraçı direktor postunu tutub. Onun rəhbərliyi altında “eBay” 30 əməkdaşdan ibarət kiçik şirkətdən çoxmilyardlı biznesə çevrildi.

“HP” şirkətinin sabiq rəhbəri Leo Apoteker 2010-cu ilin oktyabr ayında icraçı direktor vəzifəsinə təyin edilib. Onun 11 aylıq rəhbərliyi ərzində şirkətin səhmlərinin qiyməti 47 faiz aşağı düşüb.

---