İKT

Tarix:17/08/12

Azərbaycanın ədəbi irsinin virtual bazası hazırlanır

Mədəniyyət və Turizm Nazirliyi Xarici İşlər Nazirliyi ilə birgə Avropa Yenidənqurma və İnkişaf Bankının dəstəyi ilə “Azərbaycanın ədəbi irsinin virtual bazası” layihəsini həyata keçirir. Bununla əlaqədar Azərbaycan muzey və kitabxanalarında saxlanılan müvafiq kitabların elektron versiyalarının hazırlanması və onların internet səhifəsində yerləşdirilməsi üçün təklif olunan kitabların siyahısı hazırlanaraq Xarici İşlər Nazirliyinə təqdim edilib.

“ICTnews” elektron xəbər xidmətinə bu barədə Mədəniyyət və Turizm Nazirliyinin (MTN) mətbuat xidmətindən məlumat verilib. MTN-dən bildirilib ki, nazirlik tərəfindən “Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı”nın icrası məqsədi ilə yaradılmış veb-saytların və “Elektron kataloq”ların monitorinqi aparılıb, monitorinq nəticəsində aşkar olunmuş nöqsan və çatışmazlıqların aradan qaldırılması məqsədi ilə monitorinqin nəticələri şəhər, rayon MKS-lərinə göndərilib və müvafiq tapşırıqlar verilib:

“Kitabxanaçıların təhsili, o cümlədən bilik və bacarıqlarının inkişafına nazirlik tərəfindən xüsusi önəm verilib. Bununla əlaqədar, Rusiya Federasiyasının Mədəniyyət, İncəsənət və Turizm İşçilərinin Yenidən Hazırlanması Akademiyası tərəfindən 10 Azərbaycan mütəxəssisi üçün “Kitabxanaların fəaliyyətində İnternet texnologiyalarının tətbiqi” proqramı üzrə distant təhsil kursu təşkil olunub və kitabxanaçılar sözügedən kurslarda iştirak ediblər. Azərbaycan kitabxanaları üçün zəruri olan hazır biblioqrafik təsvirlərin Rusiya Milli Kitabxana İnformasiya Mərkəzindən (LİBNET) alınması sözügedən təşkilatla razılaşdırılıb”.

Bundan əlavə, ötən dövrdə Azərbaycan Milli Kitabxana İnformasiya Mərkəzi (AZLİBNET) yaradılıb. Artıq AZLİBNET-in veb-saytı hazırlanıb, toplu kataloqun yaradılmasında bir sıra işlər görülüb: “Hesabat dövründə, Rusiya Dövlət Kitabxanası, habelə Rusiya Xarici Ədəbiyyat Kitabxanasının rəhbərliyi və tanınmış kitabxana mütəxəssisləri Azərbaycanda səfərdə olub, respublikanın aparıcı kitabxanalarında görüşlər keçirib və Azərbaycan kitabxanaçıları ilə fikir mübadiləsi aparıblar. Həmçinin, Türkiyənin Alaniya kitabxanasına Azərbaycan, onun mədəniyyəti, tarixi, turizmi, adət və ənənələri, dövlətçiliyi barədə müxtəlif kitablar və elektron nəşrlər göndərilib.

Bundan başqa, “Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı”nın icrasını, kitabxana filiallarının birləşdirilməsi vəziyyətinin, kitabxanaların informasiyalaşdırılmasının, habelə “Elektron kataloq” və veb-saytların keyfiyyətini, kitabxanaçı kadrların kompyuter biliklərinin səviyyəsini öyrənmək, sözügedən rayon Mərkəzi kitabxanalarında yeni şöbələrin fəaliyyəti ilə tanış olmaq məqsədi ilə respublikanın Füzuli, Beyləqan, Hacıqabul, Kürdəmir, Quba və Xaçmaz rayonlarına ezamiyyələr təşkil olunub”.

Həqiqət İSABALAYEVA

Baxış sayı: 1240