TEXNOLOJİ YENİLİKLƏR

Tarix:01/11/12

Çin 100 petaflop/san gücündə super-kompüter hazırlayacaq

Bu günlərdə ABŞ-da 20 petaflop/san gücündə “Titan” super-kompüterinin yaradılması haqqında elan edilib. Lakin Çindən olan nümayəndələrin verdiyi məlumata görə, hazırda “Titan”dan 5 dəfə daha güclü super-kompüterin hazırlanması planlaşdırılır. Həm də bu super-kompüter Çin istehsalı olan prosessorlar əsasında işləyəcək.

“ICTnews.az” elektron xəbər xidməti “cybersecurity.ru” saytına istinadən bildirir ki, Quançjou super-kompüter mərkəzindən (super-kompüter burada yerləşəcək) verilən məlumata əsasən, yeni “Tyan'e-2” hesablama qovşağı 2015-ci ildə istifadəyə veriləcək. Bu super-kompüter sayəsində Çin belə həllər bazarında rəqabətə davamlı olaraq qalacaq.

Mütəxəssislər, həmçinin qeyd ediblər ki, 2015-ci ildə 100 petaflops gücündə kompüter elə də qeyri-adi səslənməyəcək. Belə ki, sahə üzrə ekspertlər 2018-ci ildə 1000 petaflop/san gücündə super-kompüter hazırlamağa imkan verəcək məhsulların yaranacağını hesab edirlər.

Qeyd edək ki, 2010-cu ildə “Tyan'e-1” super-kompüteri “Top-500” siyahısında birinci yerdə qərarlaşmışdı. Hazırda o, “Top-500” reytinqində beşincidir. 4.7 petaflop/san gücündə olan “Tyan'e-1” super-kompüteri “İntel” və “Nvidia” çipləri əsasında işləyir.

“Tyan'e-2” super-kompüteri Çinin Milli Müdafiə Texnologiyaları Universitetinin bazası əsasında yaradılacaq. Universitetdən verilən məlumata əsasən, hazırkı super-kompüterin yaradılmasının arxasında rəsmi Pekin dayanıb. Bu yaxınlarda “Tyan'e-2” super-kompüteri üzərində aparılan işlərə Çin Elmlər Akademiyasının nəzdində fəaliyyət göstərən Proqram Təminatı İnstitutunda çalışan mütəxəssislər qoşulublar.

Məlumat üçün qeyd edək ki, Çin Xalq Respublikası (ÇXR) 2015-ci ilədək 100 petaflop/san gücündə super-kompüter hazırlamağa çalışan yeganə dövlət deyil. Avropa İttifaqı, Yaponiya və ABŞ da bu cür planlar haqqında elan edib.

EMİL

Baxış sayı: 1557