İKT

Tarix:28/01/13

İnternet kanalları üzərindən mobil zənglərin daxili zənglər kimi ötürülməsi nəticəsində RİTN-ə dəyən ziyanın qarşısı alınıb

Rabitə və İnformasiya Texnologiyaları Nazirliyi (RİTN) xarici əlaqələrin inkişaf etdirilməsi, o cümlədən ölkəmizdə rabitə və İKT sahəsində aparılan islahatların beynəlxalq aləmdə tanınması üçün əhəmiyyətli işləri 2012-ci il ərzində də davam etdirib.

Ötən il bu məqsədlə ikitərəfli görüşlər keçirilib, dünyanın müxtəlif ölkələri ilə İKT sahəsi üzrə sənədlər imzalanıb. Nazir və nazirliyin digər məsul şəxsləri dünyanın bir neçə ölkəsində keçirilmiş beynəlxalq tədbirlərdə iştirak edib və bir sıra beynəlxalq əhəmiyyətli konfranslar keçirilib. Həmçinin nazirlik tərəfindən qanunvericilik bazasının yaradılması və təkmilləşdirilməsi istiqamətində də işlər davam etdirilib, müxtəlif normativ sənədlər hazırlanıb və təsdiq olunub.

Bu işlərlə yanaşı, internet kanalları üzərindən nəzarətdən kənar, beynəlxalq stansiyada qeydiyyatı aparılmadan və xüsusi razılıq (lisenziya) tələb olunduğu halda belə razılıq almadan Bakı şəhərində müxtəlif cinayətkar qruplar tərəfindən Azərbaycana beynəlxalq giriş mobil zənglərinin daxili zənglər kimi ötürülməsi nəticəsində RİTN-ə dəyən ziyanın qarşısı alınıb.

Bu istiqamətdə müvafiq tədbirlər davam etdirilir. Bundan başqa, FİM Bank işi üzrə Hollandiyanın Haaqa Apelyasiya Məhkəməsində 2012-ci il 24 yanvar tarixində şifahi məhkəmə çəkişməsi keçirilib.

İş üzrə məhkəmə qətnaməsinin 24.04.2012-ci il tarixində çıxarılması müəyyənləşdirilsə də, məhkəmə qərarın elan edilməsini 14 avqust 2012-ci il tarixinə təyin edib, daha sonra isə Haaqa Apelyasiya Məhkəməsi qərarın elan edilməsini 29 yanvar 2013-cü il tarixinə təxirə salıb.

Azərbaycan tərəfinin məhkəmə prosesində hüquqlarının qorunması sahəsində tədbirlər davam edir.

HƏQİQƏT

Baxış sayı: 976