İKT

Tarix:18/03/13

Monqolustan, Əfqanıstan və Tacikistan Azərbaycanın gömrük xidmətinin informasiya texnologiyaları üzrə təcrübəsi ilə tanışlıq arzusundadır

Monqolustan Baş Gömrük İdarəsi, Əfqanıstan Maliyyə Nazirliyinin Gömrük Xidməti və Tacikistan Respublikası Hökuməti yanında Gömrük Xidmətinin nümayəndələri Azərbaycan gömrük xidmətinin informasiya texnologiyaları, həmçinin "bir pəncərə" prinsipi sahəsində mövcud təcrübəsi ilə yaxından tanış olmaq arzusundadırlar.

Tərəflər bu istəklərini Qazaxıstanın paytaxtı Astana şəhərində keçirilən "Gömrük Prosedurlarının Sadələşdirilməsi və Harmonizə edilməsi haqqında Beynəlxalq Konvensiya"ya (Kioto Konvensiyası) dair seminarda bildiriblər. "ICTnews" elektron xəbər xidmətinə bu barədə Dövlət Gömrük Komitəsindən məlumat verilib.

Komitədən bildirilib ki, Mərkəzi Asiya Regional İqtisadi Əməkdaşlıq Proqramına üzv ölkələr üçün Ümumdünya Gömrük Təşkilatı və Asiya İnkişaf Bankının birgə təşkil etdikləri tədbirdə gömrük prosedurlarının və sənədləşmənin sadələşdirilməsi, standartlara uyğunlaşdırılması və harmonikləşdirilməsi, inzibati işin səmərəliliyinin artırılması, sərnişinlərin və malların sərbəst keçidinin stimullaşdırılması, prosedurların şəffaflığının yüksəldilməsi, eləcə də gömrük xidmətlərinin müasirləşdirilməsi və məlumat mübadiləsi üçün informasiya-kommunikasiya texnologiyalarının tətbiqi, risklərin idarə olunması və gömrükdən sonra audit, gömrük nəzarəti və regional tranzitin inkişaf etdirilməsi məsələlərinə toxunulub.

Tədbirdə gömrük qanunvericiliyinə təsir edən əsas texniki meyarlar, gömrük xidmətinin qloballaşdırılması, gömrük işində və ticarətdəki dəyişikliklər, texnologiya və çağırışlar, risklərin idarə edilməsi, İKT-dən istifadə, audit əsasında nəzarət və xarici iqtisadi fəaliyyət iştirakçıları ilə əməkdaşlıq məsələləri də diqqətdə olub.

HƏQİQƏT

Baxış sayı: 791