12px13px15px17px
Tarix:14/03/14

“Müəllim hazırlığının müasir problemləri: informasiya, texnologiyalar, təhsilin inkişafı” mövzusunda III Beynəlxalq Elmi konfrans keçiriləcək

22-24 may 2014-cü il tarixində Azərbaycanda “Müəllim hazırlığının müasir problemləri: informasiya, texnologiyalar, təhsilin inkişafı” mövzusunda III Beynəlxalq Elmi konfrans keçiriləcək.
 
Azərbaycan Müəllimlər İnstitutu tərəfindən təşkil edilən konfransın əsas məqsədi müasir tələblərə cavab verən təhsil sisteminin formalaşması və inkişafı, yeni təlim texnologiyaları və informasiya vasitələrindən professional səviyyədə istifadə yolları və prinsiplərinin müəyyənləşdirilməsi, idarəetmə sisteminin təkmilləşdirilməsi, kadr təminatı (yeni ixtisaslar üzrə kadrların hazırlanması, ixtisasartırma) məsələlərinə dair dialoqların və təcrübə mübadiləsinin aparılması, bu sahədə novator xarakterli məruzələrin nəşr edilməsidir.
 
 
Təşkilat Komitəsindən qeyd edilib ki, konfransda müəllim hazırlığı ilə bağlı yeni layihələr və innovativ xarakterli yazılar təqdim etmək istəyən tədqiqatçılar, müəllimlər və təhsil sistemi ilə yaxından maraqlananlar iştirak edə bilərlər. Konfransın əsas müzakirə istiqamətlərinə “Müasir dövrdə təhsilin aktual problemləri və informasiya təminatı”, “Təhsildə baryerlər: novatorluq, konservatizm, ziddiyyətlər”, “Təhsil və tərbiyə sistemlərinin qarşılıqlı münasibətləri”, “Təhsildə innovativ metodların öyrənilməsi, tədqiqi  və tətbiqinin aparıcı istiqamətləri”, “İlkin müəllim hazırlığında müasir təlim texnologiyalarının və ənənəvi metodların funksiyaları”, “Təhsilin keyfiyyətinin meyarları və ona təsir edən amillər” daxildir.
 
 Konfransın işində (ünvan: Azərbaycan Müəllimlər İnstitutu, Bakı, Akademik Həsən Əliyev küçəsi 104, www.ami.az; əlaqə telefonu: Tel.:/Fax: (012) 564-80-47) iştirak etmək arzusunda olanlar nəzərdə tutulan məruzələrin  tezislərini 01.03.2014-cü il tarixinə qədər müraciət forması ilə birlikdə “conference_ati@hotmail.com” ünvanına göndərməlidirlər. Tezislər A4 formatında, hər tərəfdən 2,5 sm, interval 1,5, şrift “Times New Roman” olmaqla 12pt, 1-2 səhifə həcmində, Azərbaycan, rus və ya ingilis dillərində təqdim edilməlidir.
 
 Məruzə və çıxışlar müasir təcrübə, təhsilin vəzifələrinin və vəziyyətinin təhlili və son elmi əsərlərdə olan müddəalara əsaslanmalıdır. Dərslik və dərs vəsaitlərinə istinad olunmamalıdır.
 
 
Həqiqət İSABALAYEVA



Baxış sayı: 1585

© İstifadə edilərkən İctnews-a istinad olunmalıdır

Facebook Google Favorites.Live BobrDobr Delicious Twitter Propeller Diigo Yahoo Memori MoeMesto






28 Mart 2024

27 03 2024