İKT

Tarix:29/04/14

Texniki ali məktəblərdə dil fənlərinin tədrisində İT-nin tətbiqinə dair seminar keçirilib

Azərbaycan Texniki Universitetində (AzTU) ulu öndər Heydər Əliyevin anadan olmasının 91-ci ildönümünə həsr edilmiş “Texniki ali məktəblərdə dil fənlərinin tədrisində informasiya texnologiyalarının tətbiqi” mövzusunda elmi-nəzəri seminar keçirilib.

AzTU-dan verilən məlumata görə, universitetin prorektoru, professor Elşad İsmibəyli tədbiri açaraq ölkəmizdə təhsil strategiyasının həyata keçirilməsində, təhsilin “Boloniya sistemi”nin uğurla tətbiq edilməsində xarici dillərin tədrisinin təkmilləşdirilməsinin mühüm əhəmiyyət kəsb etdiyini qeyd edib. Onun sözlərinə görə, AzTU-da bununla bağlı konkret proqram hazırlanıb və uğurla həyata keçirilməkdədir”.

Seminarda universitetin Beynəlxalq əlaqələr üzrə prorektoru, professor Mustafa Babanlı dil kafedralarında tədris metodikasını təkmilləşdirmək məsələlərindən danışıb. O bildirib ki, AzTU dünyanın yüzə qədər ali məktəbi ilə əməkdaşlıq edir. Tələbə və müəllim mübadiləsi proqramına uyğun olaraq Azərbaycan Texniki Universitetinin tələbələri onlarla ölkənin ali məktəblərində təhsillərini davam etdirirlər. Xarici dilləri mükəmməl öyrənmədən bu proqramı yerinə yetirmək mümkün deyildir.

Daha sonra “Dil fənlərinin tədrisində müstəqil işin təşkili zamanı kompüter texnologiyalarından istifadə olunmasının əhəmiyyəti”, “Müstəqillik dövründə dilimizin inkişaf problemləri”, “Azərbaycan dilində rus terminologiyasından istifadə” və “Xarici dillərin tədrisinin bəzi xüsusiyyətləri” mövzularında məruzələr dinlənilib.

CAHANGİR

Baxış sayı: 588