İKT

Tarix:14/08/14

Analitiklər qlobal İT xərclər üzrə proqnoza yenidən baxıblar

“Forrester” analitik şirkəti 2014-cü ildə qlobal İT xərclər üzrə qiymətləndirməsinə yenidən baxıb. Ekspertlər hesab edirlər ki, bu sahədə xərclər əvvəl gözlənildiyi kimi 6,2 faiz deyil, 3.3 faiz artacaq və cari ildə informasiya texnologiyalarına (İT) sərf olunacaq xərclərin ümumi dəyəri 2,2 trilyon ABŞ dolları təşkil edəcək.

“ICTnews” elektron xəbər xidməti “dailycomm.ru” saytına istinadən bildirir ki, “Forrester”in analitiki Endryu Bertels bildirib ki, ABŞ və Böyük Britaniya kimi iqtisadi cəhətdən inkişaf etmiş ölkələr bütün texnologiya bazarını öz arxasınca apara biləcək hərəkətverici qüvvə rolunu oynayacaqlar. Bu halda, Latın Amerikası ölkələrində ABŞ-la müqayisədə daha yüksək artım qeydə alına bilər.

“Forrester”in proqnozuna görə, müştərilərə xidmət göstərərilməsinə hesablanmış texnologiya məhsulları və xidmətlərinə sərf olunan xərclər daha sürətlə artacaq: bu sahədə xərclərin 9,6 faiz artaraq 297 milyard dollara çatacağı güman edilir.

Ekspertlər, həmçinin proqnozlaşdırır ki, personalın işinin təşkili ilə bağlı İT məhsullarına sərf olunan xərclər 2,3 faiz artaraq 1 trilyon dollar olacaq. Bu halda İT infrastrukturun inkişafı ilə bağlı xərclər 917 milyard dollar səviyyəsində gözlənilir ki, bu da ötən ilki göstəricidən 2,5 faiz yüksəkdir.

Baxış sayı: 853