İNTERNET

Tarix:03/09/14

İnternet şirkəti kvant kompüterlər üçün prosessorlar yaradır

Kaliforniya Universitetinin alimləri "Coogle" şirkətinin "Quantum Artificial Intelligence" tədqiqat qrupu ilə birlikdə kvant kompüterlər üçün yüksək dəqiqliyə malik elektron keçirici komponentlərə əsaslanan prosessor hazırlamağa başlayıb. Universitetin professoru Con Martinisin rəhbərliyi ilə qrup bu komponentlərin yaradılmasında böyük uğura nail olub. Alimlər "Google" mütəxəssislərinə qoşularaq optimallaşdırma və məntiqi fikir tapşırıqlarının həlli üçün kvant prosessorların yeni konstruksiyalarını ərsəyə gətirməyə çalışacaqlar. Bundan başqa, kvant kompüterin yaradıldığı "D-Wave Systems" şirkəti və "NASA"-nın "Vesuvius" prosessorlu 512 kubit tutumlu kompüterin quraşdırıldığı tədqiqat mərkəzi ilə əməkdaşlıq nəzərdə tutulur. O, 1000 kubit tutumlu "Washington" prosessoru ilə əvəzlənəcək.

Kubitlər və ya kvant bitlər informasiyanın kvant kompüterdə saxlanılması elementidir. Kvant mexanikasının qanunları onlara ikili vəziyyətdə olmaq imkanını verir ki, bunun da sayəsində kompüter paralel hesablamalar apara bilir. Lakin kubitlər temperatur və maqnit sahəsi dəyişikliklərinə qarşı çox həssasdır. Kaliforniya Universitetinin alimləri məhz bu problemin həlli üzərində uğurla iş aparırlar, - "www.osp.ru" yazır.

Baxış sayı: 1070