GÖRÜŞLƏR

Tarix:27/12/14

Rabitə və yüksək texnologiyalar naziri Ağcabədidə vətəndaşlarla görüşüb

Prezident İlham Əliyevin tapşırıq və tövsiyələrinə müvafiq olaraq mərkəzi icra hakimiyyəti orqanlarının rəhbərləri bölgələrdə vətəndaşların qəbulunu davam etdirir, onların müraciət, şikayət və təkliflərinin araşdırılaraq həll olunması üçün konkret tədbirlər görürlər.

Tərtib olunmuş qrafikə əsasən, rabitə və yüksək texnologiyalar naziri Əli Abbasov dekabrın 27-də Ağcabədi şəhərində Beyləqan, Ağcabədi, Zərdab, Füzuli, İmişli, Xocavənd və Cəbrayıl rayonlarından olan vətəndaşları qəbul edib.

Nazirliyin müvafiq struktur rəhbərlərinin də iştirak etdikləri qəbulda, eyni zamanda, müraciətlərin operativ araşdırılması və həlli məqsədilə rayonların poçt şöbələrinin və telekommunikasiya qovşaqlarının rəhbərləri ilə videoəlaqə yaradılıb.

Qəbul zamanı vətəndaşlar əsasən işlə təmin olunmaq, bir sıra yerlərdə, xüsusən ucqar yaşayış məntəqələrində telefon rabitəsinin, habelə internet, poçt, televiziya və radio yayım xidmətlərinin keyfiyyətinin yaxşılaşdırılması və digər məsələlərlə bağlı müraciətlər ediblər.

Müraciət edən hər bir vətəndaş diqqətlə dinlənilib. Qaldırılan məsələlərin əksəriyyəti yerindəcə həllini tapıb. Araşdırılmaya ehtiyac olan bəzi müraciətlər isə qeydiyyata götürülüb. Onların operativ həlli üçün nazirliyin müvafiq struktur rəhbərlərinə konkret tapşırıqlar verilib.

Qəbul zamanı nazirliyin səlahiyyətlərinə aid olmayan məsələlərlə bağlı müraciətlər də olub. Həmin müraciətlər müvafiq strukturlara göndərilərək həll olunması üçün qeydiyyata alınıb.

Qəbuldan sonra 2014-cü ildə ölkə üzrə vətəndaşların qəbulu ilə bağlı keçirilən görüşlərin yekunu olaraq videokonfrans təşkil edilib.

Baxış sayı: 1727