İNTERNET

Tarix:21/10/15

Dövlət orqanlarının rəsmi internet səhifələrinə daxil olanların sayı artıb

Azərbaycanda dövlət orqanlarının rəsmi internet səhifələrinə daxil olanların sayı gündən-günə artmaqdadır.

Vətəndaşlar dövlət orqanlarının saytlarına həm elektron xidmətlərdən yararlanmaq, həm də həmin sahə üzrə baş verən yeniliklərdən xəbərdar olmaq üçün müraciət edirlər. Məlumatları birbaşa mənbələrdən almaqla öz gündəlik fəaliyyətlərini həyata keçirirlər.

“ICTnews.az” elektron xəbər xidməti bildirir ki, Vergilər Nazirliyinin rəsmi internet səhifəsinə də daxil olanların sayında artım qeydə alınıb. Belə ki, nazirlikdən verilən məlumata görə, cari ilin ilk 9 ayı ərzində VN-in rəsmi səhifəsinə daxil olanların sayı 3,3 milyona yaxın olub. Bu dövr ərzində vergi ödəyicilərinin məlumatlandırılması məqsədilə onlara 1367469 mesaj, o cümlədən 1367469-u qısa mesaj (sms) göndərilib. Nazirlik bəyan edir ki, 2015-ci ilin 9 ayı ərzində vergi ödəyicilərinə xidmət strukturlarında 285104 müraciət qeydə alınıb, müraciət edənlərə 418805 sayda, o cümlədən Vergilər Nazirliyinin Bakı şəhərindəki Vergi ödəyicilərinə xidmət mərkəzinə müraciət edən 24765 şəxsə 37049 sayda xidmət göstərilib.

Onu da qeyd edək ki, hesabat dövründə nazirliyin Çağrı Mərkəzinin əməkdaşları tərəfindən canlı əlaqə zamanı 149612 müraciət cavablandırılıbdır. Müraciətlərin 29,7%-i vergilər, 20,3%-i vergi nəzarəti tədbirləri, 16,9%-i vergi orqanlarının hüquq və vəzifələri, qalanları isə digər məsələlər barədə olub.

SEYMUR

Baxış sayı: 714