XƏBƏRLƏR

Tarix:04/01/18

Tokio olimpiadasında sifətin tanınması sistemindən istifadə olunacaq

2020-ci il Tokio Olimpiya və Paralimpiya oyunlarının təşkilat komitəsi idman tədbirlərinin təhlükəsizliyini sifətin tanınması sistemi ilə gücləndirmək niyyətindədir. Bu, saxta və oğurlanmış şəxsiyyət vəsiqələri ilə mübarizə və idmançı, vəzifəli şəxslər və KİV nümayəndələrinin ictimai yerlərə daxil olan zaman daha tez hərəkət etmələri üçün tətbiq olunacaq. İlkin qiymətləndirməyə görə, 400 minədək insanı emal edə biləcək sistem Olimpiya oyunları tarixində tətbiq edilən ən böyük sifətin tanınması sistemi olacaq.

“ICTnews” Elektron Xəbər Xidməti “4PDA” resursuna istinadən yazır ki, təşkilatçılar bütün idmançı, əməkdaş, mətbuat nümayəndələri və olimpiadaya aidiyyəti olan digər şəxslərin üzünün fotoşəkillərindən ibarət baza yaratmaq niyyətindədirlər. Lakin tamaşaçılar əvvəllər olduğu kimi, bilet təqdim etməli olacaqlar, çünki bu miqyasda sistem yaratmaq müəyyən çətinliklər törədir. Növbəti iki il ərzində mütəxəssislər tərəfindən buraxılış məntəqələrində yubanmaların qarşısını almaq üçün texnologiyanın təkmilləşdirilməsi planlaşdırılır.

Məlumata görə, Tokio olimpiadasında sifətin tanınması texnologiyasının yaradılması bu sahədə uzun illərdir fəaliyyət göstərən “NEC Corp.” şirkətinə həvalə olunub. Şirkət 2014-cü ildə Çikaqo polisinə cinayətkarı izləməyə kömək edən “NeoFace” sistemini təqdim etməklə məşhurlaşıb. “NeoFace” real vaxt rejimində videodakı insanların təhlilini aparır və məlumat bazasında oxşar sifətlər axtarmaqla uyğunsuzluqlar barədə xəbərdarlıq edir.

“NEC Corp.” texnologiyasından, həmçinin “CaliBurge” restoranlarında istifadə edilir. Müştəriləri tanıyan sistem onlara əvvəlki sifarişlər əsasında yeməklər təklif edir.

Nizam Nuriyev

Baxış sayı: 420