İNTERNET

Tarix:18/09/14

Azərbaycanda kredit rəsmiləşdirilməsi üçün elektron arayışdan istifadəyə başlanıldı

Azərbaycanın bankçılıq tarixində ilk dəfə "Bank of Baku" kredit rəsmiləşdirilməsi üçün elektron arayışdan istifadə etməyi təklif edir. Bu yenilik, "Bank of Baku"nun "Elektron hökumət" portalı ilə əməkdaşlığı sayəsində baş verir. Müvafiq müqavilə Rabitə və Yüksək Texnologiyalar Nazirliyinin (RYTN) Məlumat Hesablama Mərkəzi (MHM) və "Bank of Baku" arasında imzalanıb.

Elektron arayışla kredit rəsmiləşdirmək üçün sadə bir üsul təklif olunur: "Müştəri "www.e-gov.az" "Elektron hökumət" portalına daxil olaraq "Vətəndaşa aid fərdi məlumatlar üzrə elektron arayışın verilməsi" xidməti vasitəsi ilə elektron arayışı formalaşdırır və banka göndərir".

Elektron portala daxil olmaq üçün elektron imza sertifikatı, "ASAN imza" və ya kod parollardan istifadə etmək olar. Kod parolu almaq üçün vətəndaş elektron portalda onlayn qeydiyyat xidmətindən istifadə edə bilər. Kod parolları həmçinin Bakı şəhərində və rayon mərkəzlərində bütün poçt şöbələrində ödənişsiz olaraq əldə etmək olar.

Müqavilə şərtlərinə əsasən, bankın filiallarında, eyni zamanda MHM-in qeydiyyat məntəqələri fəaliyyətə başlayır. Belə ki, müştəri kod parol olan zərfləri bank filiallarından da əldə edə bilər. Bunun üçün şəxsiyyət vəsiqəsini təqdim etmək kifayətdir.

Qeydiyyata düşən müştəriyə xüsusi zərfdə şifr təqdim olunur. Bu şifr ilə müştəri öz şəxsi kabinetinə rahat daxil olub elektron arayış göndərə bilər.
Müştəri fərdi məlumatlar üzrə elektron arayışı evindən, iş yerindən və yaxud bankda bu layihə üçün quraşdırılmış xüsusi kompüter vasitəsilə də göndərə bilər.
Göndərilən arayışlar "Elektron hökumət" tərəfindən onlayn qaydada imzalanır. Bankla iş tarixçəsindən və ödəniş qabiliyyətindən asılı olaraq ona nağd kredit, "Bolkart" və ya imtiyazlı "Dostlar Klubu" kartları təklif olunur.

Beləliklə, kredit almaq niyyətində olan şəxs banka baş çəkib "Elektron hökumət" portalı vasitəsilə elektron arayış göndərə bilər.

Elektron arayışların verilməsi "Bank of Baku"nun baş ofisində (Atatürk pr. 42) artıq başlayıb. Cari ay ərzində isə bu xidmət bankın filiallarında da həyata keçiriləcək.

Qeyd edək ki, "Bank of Baku"nun "Elektron hökumət" portalı ilə əməkdaşlığı çərçivəsində yaxın zamanlarda yeni innovativ layihələr təqdim ediləcək.

CAHANGİR

Baxış sayı: 1336