Əməkdar rabitəçi Tərlan Mehdiyev: “Bu sənəti sevdinsə, “xroniki xəstə” olursan”

Daha sonra tənzimləyici mühəndis kimi Masallı, Lənkəran, Mardakert, Stepanakertdə, Bakı şəhərində isə 64, 31, 21 kimi ATS-lərin tikinti və quraşdırılmasında iştirak etmişəm. 1969-cu ildə ümummilli liderimiz hakimiyyətə gələn zaman gənc milli kadrların seçimi ilə əlaqədar 27 yaşımda "Azər-rabitə" İnşaat Trestinə baş mühəndis təyin olundum. Həmin trestin tərkibinə respublikada rabitənin bütün sahələri üzrə təmir-tikinti işləri aparan 12 təşkilat daxil idi. Həmin illərdə Azərbaycanda, o cümlədən Bakıda ATS-lərin, rabitənin geriliyini nəzərə alaraq, ulu öndərimizin imzaladığı sərəncam əsasında Bakı şəhərində tikilən ATS-lərin direksiyası yaradıldı. Onda - 1975-ci ildə  "Azər-rabitə" İnşaat Trestinin rəisi işləyirdim.
 

Oradan göndərişlə həmin direksiyaya direktor təyin olundum. O illərdə Bakıda yaşanan gerilik üzündən əhali 20-25 il telefon növbəsində dayanırdı. Beləliklə, rəhmətlik rabitə naziri Nəsrulla İbrahimoğlunun rəhbərliyi ilə Azərbaycanda güclü təkamül dövrü başladı. Direksiyanın vəzifəsinə Bakıda tikilən ATS-lərin binaları, onların layihələndirilməsi, maliyyələşdirilməsi, avadanlıqla təchizatı daxil idi. 1980-ci ilə qədər direksiyada direktor işlədim və o dövrdə ancaq Bakı şəhəri üzrə 137 min nömrə tutumlu stansiya istifadəyə verildi.
 

Oradakı fəaliyyətimi nəzərə alaraq, məni 1980-ci ildə SSRİ-nin tabeliyində olan trestin Bakı idarəsinə rəis təyin etdilər və 1986-cı ilə qədər rəis işlədim. O dövrdə 260 min nömrə tutumundan çox Bakı və respublikanın rayonlarında, eyni zamanda da xarici ölkələrdə ATS-lər tikib istismara verdik. Rəis təyin olunduğum zamanlarda burada 10 faiz milli kadr, 90 faiz isə qeyri-millətlərin nümayəndələri idi. Qarşıma milli kadrlar yetişdirərək, tresti milli kadrlarla təchiz etmək məqsədi qoydum.
 

Milli kadrları başqa ölkələrə ezamiyyətə göndərirdim. Hərbi xidmətdən qayıdan gəncləri işə cəlb edir, sənət öyrədib maaş verir, yataqxana ilə təmin edirdim. İnstituta qəbul ola bilməyən gənc qızları da yataqxana ilə təmin edib, təqaüd verərək, montaj stansiyalarının quraşdırılmasına cəlb edirdik. Bu minvalla, artıq faizlər dəyişdi, mən idarədən gedəndə orada 90 faiz milli kadr, 10 faiz isə qeyri-millətlər idi. Daha sonra 1989-cu ildən 2000-ci ilə qədər "Azərpoçt"da baş direktor müavini işləmişəm. Son iş yerim "Azərpoçt"da məsləhətçi vəzifəsi olub, oradan da təqaüdə yola salınmışam.
 

Bir sözlə, kabel qaynaqçısı, sonradan ATS-lərdə tənzimləyici kimi başlayan iş fəaliyyətim ancaq rabitənin tikilib-yenidən qurulmasına və inkişafına həsr olunub. 1960-cı ildən 1997-ci ilə qədər sırf avtomatik elektrik rabitənin inkişafı, layihələndirilməsi, təchizatı, tikilib-quraşdırılması, istismara verilməsi, eyni zamanda, 1989-cu ildən 2012-ci ilə qədər poçt rabitəsi sahəsində xidmətlərim olub. Həyatımın ən uğurlu, məhsuldar dövrü isə 1969-cu ildir. Həmin il mənə həm mənzil, həm vəzifə veriblər, həm də evlənmişəm. Respublikada ilk buraxılış rabitəçi-mühəndislərdən sayılan həyat yoldaşımla bir yerdə oxumuşuq, əmək fəaliyyətinə də bir yerdə başlayıb, ailə qurmuşuq.

Yaşlı nəsillə gənc nəsil arasında bir uçurum var. Gənc nəslin daim təcrübəyə ehtiyacı olduğundan yaşlı nəsli onlardan izolə etmək olmaz. Bir var idarəetmə, bir də var ki, icraçı. Bəlkə də icraçı kimi yaşlı nəsil fiziki baxımdan yorğunluq hiss edir, ola bilsin ki, bugünkü texnologiyalarla ayaqlaşa bilmir. Amma onun həyat, iş təcrübəsi daha yüksəkdir. Ona görə də ömrüboyu deyiblər ki, yaşlı nəsillə gənc nəsil paralel getməli, estafeti gənc nəslə verməlidir.
 

"Üçümüzün birlikdə 120 illik rabitə stajımız var" 

Daim iş başında olmusunuz. Qısa zaman keçsə də, istirahətdə olan veteran rabitəçi kimi özünüzü indi neçə hiss edirsiniz?

Artıq istirahətə yola salınsam da, öz idarəmlə, Veteranlar Şurası ilə əlaqəni kəsmirəm. Mən fiziki olaraq işdən ayrılmışam, fikrim ruhən öz sənətimə bağlıdır. Nə vaxt lazım olsa, rabitənin bütün strukturları ilə bağlı öz məsləhətlərimi verə bilərəm. Evdə oturmuram, fəal həyat sürməyi xoşlayıram. Bağ sahəmdə bağçılıqla məşğul oluram. Nəvələrimlə vaxt keçirirəm. Ailəmdə yolumu davam etdirənlər də var. İşini tənzimləyici kimi başlayan oğlum da rabitəçidir. Yoldaşım, özüm və oğlumun –üçümüzün birlikdə 120 illik rabitə stajımız var. Bu qədər staj heç bir rabitəçi ailəsində yoxdur.
 
- Mütaliəyə vaxt ayıra bilirsiniz?
 
- Daim "Rabitə dünyası" qəzetini izləyirəm. Son vaxtlar çox maraqlı olub. Həm dünyəvi, həm də respublika daxilində gedən prosesləri işıqlandırır. Respublikanın mərkəzi qəzetlərini də mütaliə edirəm. Ümumiyyətlə, daha çox rabitə sahəsi ilə bağlı məlumatları oxuyuram.
 
Həqiqət İSABALAYEVA