İKT

Tarix:06/09/11

Məhkəmə “Samsung” şirkətinə yeni planşeti nümayiş etdirməyi qadağan edib

Almaniyanın Düsseldorf şəhərindəki məhkəmə “Apple” şirkətinin tələbinə görə “Samsung”a “İFA 2011” sərgisində “Galaxy Tab 7.7” planşetini göstərməyi qadağan edib. Qətnamə cümə günü, sentyabr ayının 2-də çıxıb.

Cənubi Koreya şirkətinə “Galaxy Tab 7.7” planşetini Almaniya ərazisində satmaq və yaymaq qadağan edilib. Sərgi Berlində keçirildiyindən “Samsung” şirkəti öz stendlərindən planşeti götürməyə məcbur olub.

“Galaxy Tab 7.7” planşeti sentyabr ayının 1-də “Samsung” şirkəti tərəfindən təqdim edilib. Qurğu 7,7 düym “Super AMOLED” ekranı ilə təchiz edilib. Planşet “Android” platformasında işləyir, 1.4 QHz prosessor və 8 qiqabayt daxili yaddaş ilə təchiz olunub.

“Apple” şirkəti hesab edir ki, “Samsung”un planşetləri, həmçinin bəzi smartfonları onun “iPad” və “iPhone” məhsullarının dizaynını köçürür. Bununla əlaqədar olaraq Amerika şirkəti “Samsung”u bir neçə ölkədə, həmçinin Almaniya, Avstraliya və Hollandiyada təqib edir.

Bununla belə “Samsung” və “Apple” şirkətləri əməkdaşlıq münasibətlərindədirlər, belə ki, Cənubi Koreya şirkəti “iPhone” istehsalçısına ekran və mikroprosessor tədarük edir. “İFA” ən böyük elektronika sərgilərindən biridir və 1924-cü ildən Almaniyada keçirilir.

Baxış sayı: 2785