İNTERNET

Tarix:03/05/12

Əli Həsənov: “Azərbaycanda informasiya texnologiyalarının inkişafı internet medianın təkmilləşdirilməsinə rəvac verib”

«Azərbaycanda dünya standartlarına uyğun plüralist media, elektron və yazılı KİV formalaşıb. KİV-in sayına görə, ölkəmiz MDB və Şərqi Avropa dövlətləri arasında qabaqcıl yer tutur. Azərbaycanda yüzlərlə informasiya portalı, 50-dən çox informasiya agentliyi qeydə alınıb və fəaliyyət göstərir».

"İCTnews " elektron xəbər xidmətinin məlumatına görə, bu sözləri Prezident Administrasiyasının ictimai-siyasi məsələlər şöbəsinin müdiri Əli Həsənov söyləyib. Ölkədə demokratik internet mühitinin mövcud olduğunu önə çəkən Ə.Həsənov bildirib ki, son illərdə Azərbaycanda informasiya kommunikasiya texnologiyalarının sürətli inkişafı internetin imkanlarının genişlənməsinə şərait yaradıb: «Ümumdünya İqtisadi Forumunun hesabatına görə, hazırda Azərbaycanda internet istifadəçilərinin sayı əhalinin 50 faizindən çoxunu təşkil edir. 30-dan artıq internet provayderi bu sahədə xidmət göstərir.

Azərbaycanda genişzolaqlı internet istifadəçilərinin sayı hazırda 30 faizə yaxınlaşır. Bu isə orta ümumdünya göstəricilərindən 2,5 dəfə yüksəkdir. «.az» domen zonasında qeydiyyatdan keçmiş domenlərin sayı 4,5 dəfə artıb və 15 mini keçib. Son 4 ildə internet trafikin giriş-çıxış həcmi dəfələrlə artıb, internet xidmətlərinin istifadə haqları azalıb».

SEYMUR

Baxış sayı: 840