TEXNOLOJİ YENİLİKLƏR

Tarix:15/09/16

Alimlər iki üsulla enerji hasil edən parça icad ediblər

Corciya Texnologiya İnstitutundan olan alimlər qrupu tərəfindən hazırlanmış parça günəş işığı və geyim sahibinin hərəkəti sayəsində daşınan elektronika üçün enerji hasil etmək qabiliyyətinə malikdir.

“New Atlas” nəşri yazır ki, parça sürtünmə zamanı yaranan triboelektrik effektin hesabına enerji hasil edə bilər. Yundan hazırlanmış parça triboelektrik nanogeneratorlardan başqa polimer günəş elementlərindən ibarətdir.

“ICTnews” Elektron Xəbər Xidməti “hitech.newsru.com” saytına istinadən yazır ki, tədqiqatın həmmüəlliflərindən biri Jonq Lin Vanqın sözlərinə görə, bu hibrid parça səhra şəraitində qurğuların enerji ilə doldurulması sahəsində yeni həldir.

Alimlər tədqiqat işinin gedişində yeni materialın kiçik nümunələrini düzəldərək sınaqdan keçirib və parçanın elə də çox olmayan enerji hasil etdiyini nümayiş etdiriblər, lakin bu enerji bəzi qurğuların işinin təmini üçün kifayət edə bilər.

Hazırda alimlər ixtiranı təkmilləşdirməyi, parçanın möhkəmliyini artırmağı planlaşdırır, həmçinin elektron komponentlərin küçə şəraitinə və yuyucu vasitələrin təsirinə dözmək qabiliyyətinə əmin olmaq istəyirlər. Yeni materialdan hazırlanan məhsulların kütləvi istehsala çıxarılma tarixi haqda məlumat yoxdur.

Emil Hüseynov

Baxış sayı: 721